Shakira ta cimma yarjejeniya da masu shigar da kara na kasar Sifaniya domin sasantawa kan tuhumar ta da almundahanar biyan haraji, a daidai lokacin da ake shirin fara shari’arta.
Mawakiyar yar kasar Colombia Shakira ta biya tarar kudi Yuro miliyan 7.5m – masu gabatar da ƙara sun so a daure ta tsawon shekara takwas, sannan a ci tarar ta Yuro miliyan 23.8, idan aka same ta da laifin da ake zargin ta da aikatawa.
Ta fuskanci zargin almundahana a kan kuɗi Yuro miliyan 14.5 a wata kotun da ke Barcelona.
Shakira, wadda ta sha musanta aikata wani laifi, ta ce ta cimma yarjejeniyar ne saboda da ƴaƴanta.
A cikin wani dogon bayani, ta ce ‘ya’yanta “ba sa son ganin mahaifiyarsu ta sadaukar da rayuwarta a kan wannan rikici”.
A baya dai, mawaƙiya Shakiran ta yi watsi da yarjejeniyar da masu gabatar da kara suka gabatar, a maimakon haka ta zaɓi zuwa kotu.
Rikicin ya shafi kasar da take zaune a ciki a tsakanin shekara ta 2012 zuwa 2014, inda masu gabatar da kara suka ce ta zauna a Sifaniya amma ta lissafa zaman a wani wuri.
A karkashin dokar Sifaniya, mutanen da suka shafe fiye da wata shida a kasar, ana daukar su a matsayin mazauna ne ta fuskar dalilai na biyan haraji. Amma Shakira ta musan ta cewa Sifaniya, ba ta kasance mazauniyar Sifaniya a wannan lokacin ba.
